Vie locale - À Jean-Denys Boussart

Èt qwè Dj’han-D’nis? Vos nos-avez lèyî a nos mizéres, camarådes! Bin n’a nou risse! Ça n’vis ravise nin, çoula, Fré! Vos qu’èsteût todi prèt’ a r’trossi vos mantches po d’ner on côp d’min a tot l’monde, vola qui vos tapez djus!…

Pôve nos-ôtes èt lès tchins d’tchèrète… «Pôve poyète»…

Qu’alans-gn’ fé, asteûre, sins vosse bale di Sint-Lambêrt èt vosse båbe di Charlèmagne?… Kimint va-t-èle toûrner, dimin, nosse bone vèye di Lîdje, sins vosse tièsse di bwès di Tchantchès?… Divins qué trô va-t-i co toumer, nosse lingadje walon, sins l’fwèce di vos mots?… Divins on trô d’mémwêre, por mi!

Sés-s’ bin qwè Fré Dj’han-D’nis?… I-n-a torade 30 ans, t’as tchoûkî l’pwète dè VLAN, po ratoker l’feû dès Lîdjwès… Po ’lzî r’mète l’åme è coleûr, awè… Èt, come t’aveûs lèyî ’ne pitite crèveûre al pwète, dj’ î a polou intrer podrî twè… A dåter di ç’ djoû-la, totes lès saminnes, Dj’han-D’nis s’a candjî a Marcatchou… «L’éditorial» d’a Marcatchou: dji n’sé nin si t’aveûs fêt lès comptes, divant d’ènn’ aler mins, hoûte on pô chal…

Di cès papîs-la qui t’as scrît, ènn’ a-st-avu treûs cints milions qu’on toumé, po rin, divins lès bwètes ås lètes dès Lîdjwès… Awè Fré, ti m’ètins bin, hin: treûs cints milions!… Come dji tèl di!…

–Treûs cints milions di p’titès clignètes qu’ont r’mètou al djôye li coûr dès Lîdjwès…

–Treûs cints milions di côps d’gueûye po sayî dè rèmantchî nosse vèye, cwant-èle måkéve dè toumer a bokèts…

–Treûs cints milions di côps d’coûr po fé blawter ’ne pitite loumîre, al copète di nosse tièsse a turtos…

–Treûs cints milions di mots djusses, torade è francès, torade è walon, po nos fé rapinser qui nos-avans deûs lingadjes…

–Treûs cints milions di p’titès fleûrs po nos fé houmer li bone hinêye di nosse folklôre…

Adon, po cès treûs cints milions-la di mèssèdjes d’amoûr èt d’èspwér, dji t’vou dîre chal, divant tot l’monde: mèrci co treûs cints milions d’fèyes èt…

Ås treûs vîs-omes, Fré.

- équipe de rédaction

Autres actualités à Vie locale

Articles les plus populaires

Les promotions autour de Vie locale